WorldTimeServer Clock

Cairo

السبت، ٢٤ نوفمبر ٢٠٠٧

صعلوك غاوى حرية


صعلوك غاوى حرية
صعلوك
بيحب عيشت الحرية
والنوم فوق الرصفان
عنوانى
أى زقاق أو حاره
كل الشارع عنوان
ما علينا
غواص فى بحر الحرية
وبحب الفول والطعمية
والأكل عندى بنظام
واجبه واحده تكفينى
كشرى وعليه تقلية
لو نفسى راحت لللحمه
المعده على طول وجعانى
ودوايا الفول والطعمية
معرفش طعم الكفيار
ولا حته من كتف غزال
ولاحتى نايم بمخده
ولا بيبسى ولاحتى مدام
وأنافس أجدع فنان
أنا عندى ليلى وألهام
تصاويرهم شوفتها فى مجله
صعلوك غاوى حرية
تلقانى على أى رصيف
متزعم شبكة أرهاب
التهمه بنحب فى مصر
وجامعلى شوية أصحاب
بنكشف أسرار القصر
ومزعل آل السلطان
ومهدد التاج والعرش
ومكون حزب ملاكى
معارض لوريث العرش
صعلوك غاوى حرية
من قلة طولت ف دقنى
وأنا نايم ليله فى المسجد
الفجر أذن ونداهنى
قمت أضوده وأصلى
مسكونى ولاد الحرامية
أرهابى ومطول دقنك
ف الجامع وقت الفجرية
صعلوك ولبست التهمه
الباشا عايز يترقى
وضرورى يسددله قضية
صعلوك غاوى حرية
والنوم فوق الرصفان
الظهر
ع القطر مسطح
و كل الشارع عنوان
-----------------------
خلص الكلام وحان وقت العمل
حسن عمران
Omran55.maktoobblog.com
Omran55.blogspot.com
badralnhar.maktoobblog.com
dastor76.blogspot.com

قومى يا مصر


قومى يا مصر

قومى يا مصر
لاء متقوميش
شوفى ولادك
لاء متشوفيش
خلاص أنا حا أنقلك الصوره
السلطان عايش فى القصر
قصر كبير فى آخر مصر
والحرس حامى العرش
والحاشية على الجنبين
هى دى مصر
أيوه هى دى مصر
ولسه اللى جاى
الوريث مستنى لحظه
يمسك الكرسى بأديه
والرعية
ما بلاش تسمعى باقى الحكاية
عايزه أسمع م البداية
أنتى حره
الرعية ف مصر متقسمه
فيها ناس تعبانه وناس متبسمه
والجبين مليان عرق
حامدين شاكرين
والكلام كتير ما بينهم
بس على الورق
وفجأه تلقى وششهم متلجمه
لما عينهم تلمح
عسكر السلطان
ليه يا مصر
ما فيش أمان
والظلم مرسوم صور
والدستور
عدلوه وركنوه جنب حيطه م الحيطان
وأييه السبب
لقوه معيوب
وضيعوا الكتالوج
وباقى الرعية
فيهم ناس بتقع وهى ماشية
ضعف وهزال
وفيهم ناس ماشية تكلم نفسها
دول أصحاب العيال
تلاقى المدارس قربت
وفيهم ناس ثورجية
بتدن فى مالطا
علشان كدا ألشعب مبيسمعهمش
من زحمة الشوارع
وأصوات الكلاكسات
وتسمعى كلام ولا أنغام
أمشى يا حمار شوية
أركب عجله
مين اللى ركبك عربية
وفيه ناس مبرشمه
مش دارية
وفيه ناس متعبده
وناس متشرده
وأطفال بتنام فى الشوارع
والسلطان كبر
وعلشان كدا مش قادر
وبقى تابع
ومادد أيده ع الآخر
بيصافح القاتل
اللى فتح رشاشه فى سينا
على ولادنا
بس بس كفاية
آه وعندنا حركه كفاية
قلتلك بس كفاية
ما أنا قلت م الأول محكيش
طب وليه الناس ساكتين
وفين ولادى القضاه
وولادى المحامين
والكتاب والصحافيين
ورجال السياسه ورجال الدين
ما بلاش
لازم أعرف كل حاجه
كلهم فى السجون
السلطان علشان يورث
خلاص بقى مجنون
بسجن كل اللى بيكتب بالقلم
وكل اللى بيقول لا
ومبيقلوش نعم
والمعارضه
خايفه تخرج م البرد
فيه دور داير فى البلد
كله عطس
وأيه العمل يا ولاد
مستنين يجى نور
مين نور
دا فارس
حيحطم حيطان القصر
ويبنى لينا سور
يحوط عليكى يا مصر
ويرقيكى ويبعد عنك الشر
ويروح السلطان وزمن السلطان
وترجعى تانى تنورى يا مصر
--------------------
ملحوظة : نور هو كل فارس مصرى
--------------------------

خلص الكلام وحان وقت العمل
حسن عمران
Omran55.maktoobblog.com
Omran55.blogspot.com
badralnhar.maktoobblog.com
dastor76.blogspot.com

واقف فى الطابور أتمايل


واقف فى الطابور أتمايل

شويه أروح يمين وشويه أتمايل
مليت الأنتظار من حسنه وجماله
صهدك عما عنيا
ومالو
وعريقنا وأتبلينا
ومالو
وسخنا وأستوينا
ومالو
يا عزيز وغالى علينا
ومالو
يا أبن بلدى يا عيش
نص الرغيف بقى رده
أنا راضى
مليان حصه وكمان بودره
أنا راضى
وعليك كمان كام أشاية
أنا راضى
حتى لو مليان بهارات
أنا راضى
هو الفقير يا أخونا
صاحب العيال ليه خيارات
آجيب منين أملا بطونهم
رمضان خلص وخلص صومهم
ورجعت تانى لهمومهم
الست فى البيت قلقانه
لا عايز خس ولا ملانه
طالبه العيش بالتسعيره
أعمل آيه يا أنا دلونى
قربت أقطع فى هدومى
الفقر كالنى وكل قوتى
وحددوا ليا تاريخ موتى
بقى هى دى أم الدنيا
الهم عايش جوانا
والفرح ماجاش ولا ثانية
يا عم أرحل بقى عنا
وسيب بلادنا الغلبانه
وخد ديابك السعرانه
تعود بلادنا لأحضنا
والفرح يرجع من تانى
--------------------------
خلص الكلام وحان وقت العمل
حسن عمران
Omran55.maktoobblog.com
Omran55.blogspot.com
badralnhar.maktoobblog.com
dastor76.blogspot.com