WorldTimeServer Clock

Cairo

الثلاثاء، ٩ ديسمبر ٢٠٠٨

فى يوم جانى برد وصابتنى رعشه .....



فى يوم جانى برد وصابتنى رعشه
حسيت كأن كل عضمى مكسر
فضلت سهران م الألم
ومش عارف أنام
يجينى مغص أصحى
أجرى على الحمام
وعنية وارمة م السهر
وصداع فى راسى ألمنى
عمال أشد فى الغطى
بطانية أتنين مش مكفية
برده حاسس بالبرد
أعمل آييه فى اللى جرى
دورت ع الدفى مالقيتش
غير حضنك يا مصر
هو بس اللى فيه الشفا
حضنتها أرتحت
ولما حسيت بالأمان
أفتكرت زمان
عم حنفى وعم رمزى
والجيران
أفتكرت العيد الكبير
وعيد رمضان
أفتكرت دق الهون
وسبوع الواد على
أبن عم حسين أفندى
موظف الديوان
افتكرت صباح الخير يا مصر
الأصل والطيبه
أفتكرت أدان الجامع
وأجراس الكنيسه
أفتكرت عم عبده وطنط نفيسه
أفتكرت معمار مصر الجديده
ووسط البلد وميدان رمسيس
أفتكرت شوارع نضيفه
بدون تهييس
حسيت وكأنى سايح ف باريس
لقيت هاتف فى ودانى
بقولى سلامة الشوف
ولما صحيت وشفت النهارده
أرتعشت م الألم والخوف
شوفت مصر بتتسرق بتتنهب
من غير خوف
ولما بصيت فى عيون البشر
شفت فى عنيهم خوف
قررت أعود لحضنها
أدارى فى ضلها
أنا راخر م الخوف
------------------------
كتاباتى



الثلاثاء، ٢٥ نوفمبر ٢٠٠٨




أنا وأنتى والليل يجمعنا
.......
عيناى فى عينيكى ربيع واشتياقى
.........
ويداكى حول عنقى هجر وتلاقى
.........
وصدرى وصدرك قرب وتلاقى
.........
فهل لى من مهرب أم أغوص فى هواكى
.........
يا بحر من اللغه نحوا وصرف
.........
هل لى ب قاربا شراعه حروفك ودفته كلماتى
.........
كيف أكتب فيكى شعرا وأنتى دفترى وأوراقى
.........
كلى وكلك دنيتا لا يخترقها فراقى
.........
ألا ترى عاشقا فى قلبه هوى المشتاقى
.........
يا ملهمتى وكل قصائدى وكتابى وقراءاتى
.........
ساذكر أسمك يا وطنى قبل شهادتى ومماتى
.........
فهل فى هواك عاشقا مثلى
.........
أين المفر وجزورك مغروزه
.........
فى الأعماقى
-----------
كتاباتى

السبت، ١٥ نوفمبر ٢٠٠٨

ليل وقضبان .........



أنا مين
أنا الغضبان
أنا الحيران
أنا التايه
فى حلمى سنين
أنا المسجون

أنا المصرى
متقوقع كده فى نفسى
خوف من الفرعون
أنا اللى بحلم يوم
أكون واحد من الفرسان
جاى راكب على المهرة
جاى ومعايا أمل بكره
ماسك سيف
جاى أحرر
كل الكون
لقيت نفسى
أنا المسجون

ووحده وليل
مش عارف أنا مين
ورا القضبان
طل عليا شعاع نور
نظرت بعينى
عيني شافت التنور
وطفله واقفه
فى الطابور
عينها رايحه على
الخباز
ومستنية برده الدور
تحلم بكسرة خبز
قبل ما يجي عليها الليل
ويرحل عن سماها النور
وتنداس
بدل ما نشلها على الراس
وتنباس
وتكون دى هى أمل بكره
برده مستنية الدور

وأنا متقوقع ورا القضبان
غضبان
أحس بأوجاع الوطن
خليط الرمل وياالطين
كأنه جبل
طابق على صدرى
كما الزلزال
يهز جبال يهز تلال
داير جوه حجر صوان
وأنا واقف
كما المجنون
اعمل آيه
قمت أكسر التمثال
أشفى غليلى
حسيت بهم منى أنزاح
ومن قلبى

وجلست أحلم
بصوت الناى
والعصفور
وعشه طله على الوادى
وموال بيتغنى ببلادى
ويدور الحلم
ما بين قمح وسنابل
وبستان مزروع
عنب وزتون

وافوق من السرحان
وأرجع أطل من
القضبان
أشوف بعيونى
راجل
شبح أنسان
ماشى بينده على
ولاده
وشوية ينده على
بلاده
والطفله قدامى بتكبر
تشق الليل
بلا خوف
تزيح الغيم بأحلامها
وتمطر لينا مطر
أخضر
يروى الأرض
تنبت فينا
أمل بكره
وأنا قابع ورا
القضبان
مستنى اليوم
----------------
كتاباتى

الأحد، ٢ نوفمبر ٢٠٠٨

يا عاشقين الوطن ...


يا عاشقين

الوطن

عشق النجوم للسما

كل ليله

يا عاشقين الآه

ياللى عايشين

جوه الوطن

أغراب

والأمر بقى لله

يا ساكنين الخيام

يامشردين

يااللى عايشين

على الرصيف

يا مدورين

السواقى

يا مطحونين بالقوى

يا حالمين ببكره

يا مجروحين م الزمن

يااللى أملكم

تاه

ياللى عيونكم دموع

وملامحكم آه

ياللى ممنوعين

م الكلام

ومن كل قوله

آه

يا مجروحين م الحبيب

بكره يوم

تنساه

بس ليا رجاء

عندكم

والرجالله

أسألوا

أهل الهوى

ليه ناس

بتضحك

وناس قلبها

عالوطن

حزين بيصرخ من قولة آه

يا عاشقين

الوطن

عشق الليالى المستحيله

يا مكحلين الرمش

وسط اليالى

الكحيله

يا سهرانين على

الوطن

لآجل عيونه الجميله

يا محرومين

ياللي دموعكم

نزيف للمجروحين

يالي كالك الوبا

فين ما طروح

أنا عطشان كلام
وكلى جروح
عايز أصرخ
بصوت عالى

وأقول آه

م الوجع اللى
فيا

يا عاشقين

الوطن

كل الوطن مجروح

بس نداوى جرح

تنفتح تانى جروح

خايف انا على

الوطن

يزيد عليه الألم

ويموت من الجروح

يا عاشقين

الوطن

يا عاشقين الروح

يا محرومين م الأه

يا محرومين م البوح

ليا سؤال عندكم

الأولى أن تصرخوا

ولايموت الوطن

مجروح

---------------
كتاباتى

الأربعاء، ١٥ أكتوبر ٢٠٠٨

فى سبيل الحرية........



أياك أن تقتربى منى
أو تلمسنى
أو تمسسنى
أو تبحث عنى
بالرغم من أنى
لست سراب
ولكنى حبيسه
داخل سرداب
أنا الحقيقة
وأنت سراب
أنا كل المعانى
بغير حساب
أنا أحلامك
أنفاسك
همساتك
أنا مكتوبه
فى كل كتاب
أنا كل أمل بكره
أنا معاك بالفطره
أنا ابيات شعرك
أنا نثرك
فا إن أرتنى وياك
أنشد الموت
على الطرقات
وف قلب المزارع
والمصانع والسرايات
تسمع صوتهم عالى
بيغنوا بأسمى الغالى
ليالى وساعات
لا زلت تريدنى
أختصر المسافات
واهدم جدار الزمن
وأقرأ تاريخ الوطن
من أجلى
كام من البشر
مات
فا إذا أردت ذاتك
فا اعتلى قمتى
واجمع الشاتات
واذهب الى مرقدى
لتحيينى من الممات
فلا تخاف سجانى
أو غدر الطعنات
فا إن أردتنى
ضحى فى سبيلى
وتعلم
إنكار الذات
فلست وحدك فارس
ففى سبيل الحرية
مات من الفوارس
من مات
----------
كتاباتى

الثلاثاء، ٧ أكتوبر ٢٠٠٨

قالت..........


قالت
حبيبى اتكتب فى شعرا
من الأبيات بيتين
قلت
حبيبتى لا تحسبينى من الشعراء شاعرا
وهذا لا فيه ضعف ولا لين
فا أنا إن كتبت من الأبيات مائه بيتا
ففى مصر الخوخ والتين
وفيها نيل يروى الظمأ
ماءه يشفى كل مسكين
ورياض من الخضرة على ضفتيه ممتده
كا بساط مفرود على الجنبين
تاج عروس يوم زفافها تراها تسمى لها
وتصلى على المصطفى الزين
اما أنتى يا حبيبتى تبقى غاليه
وفوق الراس والعين
وفيكى أكتب أبيات عمرى
ولن أكتفى فيكى ببيتين
كل نساء العالم أمراء
وانتى على رأسهم سلاطين
وجودك فى حياتى بستان
طارح ورود و رياحين
لو خيرونى بينك وبين مصر
لآخترت مصر فى قلبى
وانتى على الراس والعين
----------------
كتابات / عمران

الاثنين، ٦ أكتوبر ٢٠٠٨

افريدى دراعاتك ...............





افريدى دراعاتك
يا مصر
وضمينى فى أحضانك
دفينى غطينى
من برد الشتا ومر
أحزانى
أنا الحبيب الذى أحبك
ونبض قلبى ينبض
بأيمانى
آه لو خيرونى فى الموت
لكان قبرى أرضك
ما أنتى أوطانى
انا ملاح تائه بلا عنوان
وفى عينيكى عنوانى
أرى الدنيا وقد تشابهت
وتجمعت ألوانى
الضحك والحزن سيان
والغربه آلمانى
فهل من طريق للرجوع
لغريب ضل الطريق
يناشد أهل أوطانى
هل لى فى قلوبكم بيتا
أم إن نزيف الدم أدمانى
متى الرجوع يا وطنى
وما اراه فيك من ظلم
آعمانى
ما أطول ليل المنتظر
وخليط الحلو بالمر
آعيانى
يناجيك أبنك الحر يا وطنى
فهل تسمع لألحانى
أصوات النواح والفرح تشابهت
أم هذا ضعف إيمانى
حزنى عليك أوحالى إن القلوب
تتألم لآوطانى
فهل لغريب يناشدك يا وطن قبرا
أم يرحل الجثمان ويعانى
أخاف الموت غريبا بلا صدقه
تمحى ذنوبى
آه يانى
-----------------------
كتابات / عمران

الخميس، ١١ سبتمبر ٢٠٠٨

جيب العود وأعزف لحن ..........




جيب العود وأعزف لحن ولحم وموت
وأصرخ آخر النوته أصرخ عالى
صرخة موت
أعزف لحن
أعزف يا بنى لحن بأيدك
لحن لموتك
لحن سكوتك
أصل الناس كلها حا تموت
تموت غرقانه
من غير قوت
تحت الصخره
أو م الجوع
ما هى كل الناس حاتموت

أعزف لحن ينتج ثورة
ويزرع كل بلدنا مقاومه
وأضرب كل رجال السلطه
مره بأيدك
أو بالبوت

وأوعى تخاف
عمر المصرى ما كان خواف
وأشبك ايدك جوه ف أيدى
وخلى كل كلامنا بجد
أنا مش عبد
وعمر ما كان السلطه دى سيدى

وأعزف لحن
أقول أنا حر
يمكن أكون أنا دقت المر
لكن حر أيوه أنا حر
لون أرسم
شخبط لخبط
خلى كل كلامك جد

وأعزف لحن ينتج ثورة
وصحى الناس
بس بكلمه
مصر بلدكم
أصحوا بجد
ارمى همومك
ألعن يومك
عمر الخوف ما يولد
جد

واعزف لحن ولحم وموت
وأصرخ عالى صرخة موت
عمر الموت ما بيجى لحد
إلا لما يكون الوقت بجد
وقت الموت

و جيب العود وأعزف لحن ولحم وموت
وأصرخ آخر النوته أصرخ عالى
صرخة موت
----------------------
كتابات / عمران

السبت، ٣٠ أغسطس ٢٠٠٨

أمتى تعودى يا مصر


أمتى تعودى يا مصر
زى زمان
ايام ما كان بيبان فى سماكى قمر
يبات سهران
هيمان مع العشاق يحلا السهر
فى كلام وحديت بين البشر
قصدى اللى كانوا بشر
وطيور أشكال ولوان بتغرد فوق الشجر
وانت يا ليل حاسس بقلوب بتحب
وقلوب بدوب
وقلب عليل ما لوش ف السهر
أمتى تعودى يا مصر
شمس تنور كل مكان فى الكون
ألف مكان قول مليون
وأنا ماشى بين البشر
أفتخر
أنا أبن النيل أنا أبن الوطن
أنا أبن مصر الحياه لكل البشر
أنا العلم اللى بيرفرف على سينا وفلسطين
انا البطل مش المهزوم
مش أنا الواطى
انا أبنك اللى عمره ما يطاطى
أنا أكتوبر أنا رمضان أنا معاطى
أنا اللى رفعت العلم
فاكرانى
أقسم وهذا قسم
أنا برىء من هذا الزمن
مش أنا اللى باعك
ولا اللى خانك وقطع دراعك
ولا أنا القاسى اللى هانك وطاطا راسك
أنا اللى بتكلم من غير صوت
أنا اللى عمرى ما خفت من الموت
انا محمد وعلى وحسين
انا جرجس وحنا وأميين
أنا الشعب اللى بيقولك
وعد على يا مه بكره
أزيح الظالم
و تعودى يمين
----------------
كتابات / عمران
رمضان كريم

الخميس، ٢١ أغسطس ٢٠٠٨

مسكن للألم خافض للحرارة


مسكن للألم خافض للحرارة هذا هو دواء الحكومه للشعب

واللى مش حا يسمع الكلام حا نوديه للدكتور يديله حقنه

هذه الروشته الساحره التى أبتدعتها الحكومة لآسكات صوت الحق والنخوة والشهامه فى الشعب

والمؤسف أن شعبنا ظن أنه مريض وأن ما تفعله ماما حكومة هو فى صالحه فا أستسلم للأمر

لذلك تجد الحرارة هربت من الأجساد ولا أمل فى الوقت الحالى من الشفاء إلا بمعجزه من رب العالمين

ندعوا الله أن يتولانا برحمته ونكثر من الصلاه والدعاء فى رمضان

لعل وعسى يأتى الفرج من رب العبادلنا الله ولمصر الصبر على البلاء

كتابات / عمران

الأحد، ١٠ أغسطس ٢٠٠٨

هى دى مصر يا ولاد ........

خليك شجاع واتفرج
هى دى مصر يا ولاد

http://www.youtube.com/watch?v=QCI_C6B26BQ

خليك هادى ومتعلقش


تحياتى وأحترامى للجميع

السبت، ٩ أغسطس ٢٠٠٨

مجروحيين ......



مجروحيين
كل ما نداوى جرح
ينفتح فينا
بدل الجرح ميه
جرح الحبيب لما يهجر ويقسى

مهما كان
بكره يندمل وننسى
ونقول دا راح
إلا جرح الوطن
كل ما نداوى جرح
تتفتح فينا جراح
أيام وبتعدى
عليك يا غريب
وطنك
تشترى وطن
ولا تشترى حرية
أحسن م الحياة الموت
ولا يحكم خسيس فيا
كل الروض زنازين
وسدك سجون ليا
أنا أبن أرض النيل
عايش
على ضفته بحرية
من عهد مينا وأحمس
راجل
وعمرى ما كنت وليا
مهما تسلسلنا بأساورك
وتبيع لنا كذبك
وتقول لنا حرية
يحرم عليا النوم
م اليوم ولمية
آنده بأعلى صوتى
يا مراكبى أفرد قلوعك
وخدنى معاك طوعك
أبيع عمرى رخيص
وأشترى حرية
ويقول عليا الوطن
أبنى عاش بطل
ومات بطل
باع عمره فدا
وأشترى الحرية
-------------------
كتابات// أرابيسك


الأحد، ٣ أغسطس ٢٠٠٨

جمهورية مبارك المستقلة ........


جمهورية مبارك المستقلة

هكذا وضعنا أنفسنا فى خانة اليك فى ظل صمت مطلق
وهى الحالة التى تنتابنا الآن .
فى ظل أستعمار مبارك لبلادنا وأنشاء محاكم التفتيش وأصدار
وأصدار قوانين تكبل الحريات فى مصر وتكمم الأفواه فى ظل
قانون روبابيكيا عف عليه الزمن
أننا فى تلك الأيام نعيش فى ظل مستعمر
فى وقت تصمت فيه النقابات المهنية الكذابه والتى أصبحت من
ضمن الأرث والتى تركت دورها الفعلى وتفرغت للمناحرة فيما
بينها
فى ظل معارضة تعيش على أطلال الماضى ولا ترى المستقبل
وحركه تعشم الناس فيها خير ولكنها الآن فى حالة ثبات
لذلك فا لنجلس جميعا تحت ظل شجرة لنغنى أغنية الحرية
تحت السجر يا وهيبه يا ما كالنا برتقال
مصر خلاص يا وهيبه تايهه فى الميدان
ومع كل هذا السواد إلا أنى أفتح طاقة أمل وعزيمه لنعيد من
تانى يوم العصيان المدنى قبل الطوفان ما يغرقنا
ونجدد مطالبنا ونتمسك بها فهى الخلاص لمصر من كل الهموم

1- أنتخاب رئيس من بين عشرة مرشحيين
2- قصر مدة الحكم الى مدتين بأرادة الشعب
3- عدم ترشيح أقارب الدرجه الأولى قبل أنقضاء
مده قانونية على أنتخاب رئيس جديد للبلاد
4- تشكيل لجان متخصصة لآعادة تأهيل الدستور بما
يناسب والحالة الجديدة لمصر
الله أما بلغت الله أما أشهد
قبل أن ينفجر بركان غضب غير منظم سيلتهم الأخضر واليابس
-------------------------
كتابات عمران

السبت، ٢٦ يوليو ٢٠٠٨

ما أقلتلك أتعلم مسمعتش كلامى


ما أقلتلك أتعلم مسمعتش كلامى

أوباما نازل حب فى أسرائيل وأسرائيل دى يهود خلقهم ربنا
وكرهم وقبل كده أنكر أسلامه
بكره عايزك تفتكر يا أوبا لم يرفض الناخب الأمركى أن يكون
رئيسه أسود ساعتها تذكر
لا فضل لعربى على أعجمى إلا بالتقوى
وأعرف كيف تكون قيمة الأنسان محفوظه
عجبى
-------------------

كتابات / حسن عمران

حا تروح كده حا تيجى كده .........


حا تروح كده حا تيجى كده .........

حا تروح كده حا تيجى كده حا أسجنك يعنى حا أسجنك
قانون طوارىء قانون ضرايب قانون مرور قانون مصايب
قانون خابور
تروح تحشش حا أسجنك حا تروح تصلى حا أسجنك حا تروح
تقول أنى غول برده يا شعبى حاأسجنك
تعمل مظاهرة حا أسجنك تعيب عليا حا أسجنك
يعنى يا مصرى كده مسجون كده مسجون بس أمتى أطبق على
مين القانون دى حريتى
بس يا مصرى لو مش عايز تتسجن
شوفلك وظيفه تكون فيها أنت الرئيس وليك حصانه وأعمل ما بدك
وأمشى هيص
يا أما عندى حل آلاجه تشتغل لبيس أو رقاصة
يعنى آييه رقاصة يا عم
مش عارف الرقاصة اللى بترقص
----------------------

كتابات / حسن عمران

الأحد، ٦ يوليو ٢٠٠٨

قوم يا مصرى............


قوم يا مصرى

قوم يا مصرى قوم يا ابنى
يا مه سيبينى نايم بحلم
يا أبنى الراجل بيضرب أخوك
علشان بيقول الحق
يووه بقى هو أنا فتوه
طب حتى حوش عنه
ولا أتضامن معاه
يعنى أعمله آييه
هو أنا قلتله يكتب ويتكلم
طيب قوم أصحى]
سبينى نايم
طول الليل سهران
بتعمل آييه
شغال
يعينى يا ابنى
خلاص خليك نايم
خرجتى يامه
أيوه يا ابنى
سهران
بشد حجر ورا حجر
لما نفسى أتقطع
وكام أزازة بيره
وموزه وزه
وقاعده حلوه
وبعد دا كله
جايه يامه تقوليلى
قوم يا مصرى
أأقوم ليه خلينى نايم
كل يوم أنجازات ورا أنجزات
وبلدنا بقت مليانه حاجات
مشفنهاش قبل النهارده
أيام ما كان الأدب هو الحاجات
راح زمن الشهامه والجدعنه
ورجع لنا زمن البلطجه والفتوات
والأتاوه بيدلعوها
ومسمينها دمغه ومحتاجات
أنجازات شيل وعبى كذب
وكل يوم ف الهم بات
تقولى آه
حا أقول آهات
يبصوا للصورة
حبيبنا نا صيفنا
كله أنفض
وييجى معاد القبض
يسب ويلعن
فى اللى خلاه حب وطب
تقوله مش ده
يقولك بلا نيله أنسد
وأول ما يشوف بنى عسكر
يعملك بالو وهليله
ويهتف
يعيش السمك ف النيل
مصر هى أمى وناس تانية كتير
-------------------
كتابات / حسن أرابيسك

الجمعة، ٤ يوليو ٢٠٠٨

أعلن أنسحابى من حزب الجهله .........




أعلن أنسحابى من حزب الجهله
وأنضم لحزب السقايين
أشيل قربه على ضهرى
وأصب الميه باليمين
وأسجل أعتراف يا ريس
أنت كويس
وكل الناس وحشيين
وأهديك بأسم الفقرا
جلابية مخططه بالطين
وانصبك ملك ونيله
ونلبسك تاج الجزيرة
وأبعد عن كل هذا الشعب
وكل الناس الوحشيين
وأعلن أمام الخلق
وكل الملايين
إ ن أيدك يا ريس طاهره
ونضيفه
بس متعاصه شوية دم
من ناس بيقولوا الحق
ودلوقتى بقوا مساجين
ونيتك صافية يا ريس
إلا من شوية دعا عليك
من ناس مصليين
بقولوا حزبنا الله ونعم الوكيل
وزمتك نضيفه
إلا من شوية فلوس خايف عليهم مننا
قمت مستثمرهم لنا
خوف على خزانه البلد
وعرق الشقيانين
لكن الناس ما بتفهامش
باين عليهم مجانين
وأعترف يا ريس
انك أنسان شريف
شرف أمرأة العزيز
وأنك ملكش فى التهييس
ولا ليالى باريس
لذلك بأسم الشعب اللى بيشد فى الجوزه
بنقولك يا ريس ليك عندنا عوذه
علشان لما تقوم ثورة الشعب
نصلبك على باب زويله
الغورى كان بطل
أما أنت
بلا نيله
غرقت البلد كلها ومحدش فيها عام
لو طارت عليك طلقه
ووقعت فى العام
أنده بعلو صوتى
يسلم اللى داس على الزناد
واللى بص فى الناشيكان
----------------------
كتابات / حسن أرابيسك

الجمعة، ٢٧ يونيو ٢٠٠٨

آه يا دموع.........





آه يا دموع

آه يا دموع كما الينبوع منسابه

على الخدود ما بين الحدود

وسط سكون البشر

قصدى اللى كانوا بشر

عايشين فى دنيا الله

ما بين هروب وحروب



آه يا دموع تحكى قصة

وطن وناس طيبين وديابه

دارو دفته وحولوه غابه

فيه ناس بتاكل بعضها

وناس تدارى فى ظلها

وناس عايشين ومش عارفين

وناس فى الدنيا مش سائلين

وناس يدوب كدا عايشه

وناس عامية ومش شايفه

وناس تقتات

وناس عايشه على الفتات

وناس كل يوم فى الهم تبات

وناس عايشه هموم تانية

وناس ماسكه فى الدنيا



آه يا وطن مات فيك الحق

ومعدش واحد فى البلد يقدر يقول لاء

والقلوب بقت ألوان

فيه قلوب طيبه وفيه قلوب غريبه

وقلوب متحابين وقلوب ولاد ستين

وفيه قلوب قاسية وقلوب كدا ماشية

وقلوب حجر وقلوب أزاز تنكسر

وفيه قلوب مش حاسه وقلوب كدا ناسية

و قلوب مهمومه وقلوب بشر مسكونه

وفيه قلوب كدا جاحده وقلوب بالشر مجنونه

آه يا بشر ناسى

الدنيا دوارة بينا دور تطحن وتنده

مين عليه الدور

ومن كتر خوفنا من بكره

بندعى لرب الكون

يختاره من بين البشر

ويكون عليه الدور

ونعيد كمان

آه يا دموع كما الينبوع منسابه

على الخدود ما بين الحدود

وسط سكون البشر

قصدى اللى كانوا بشر

**********

كتابات / حسن أرابيسك




الأربعاء، ٢٥ يونيو ٢٠٠٨

طلع بلدنا وبختها 1



طالع بلدنا وبختها
وأوعى تخيب
وتضيع جواب الحقيقه
يا أبني نجيب
وأفتكرني دايما
لما صابتنى رصاصة
ومت فى حضنك شهيد
أوعى تنسى الولد اللى عبر القنال
ورفع معاك العلم
والرملة نار
وأفتكر
ليالى السمر
أيام ما كنا بنحلم ببكره
وليلة العيد
فاكر ليالى السما
لما يطلع فيه القمر
بدر
فاكر بدر لما كنا نحلم
نكون جنود فوق الجبل
ونول شرف الشهادة ويا الرسول
يومها فاكر للنهارده
لما قلنا الله وأكبر
صرخه واحده
كان معانا جنود كتير م الملايكه
بالعزيمة والتوكل
يالله عبرنا
وعبرت معانا مصرنا
حامله فى أيديها علم
علم الكرامه وعزنا
مكنتش أسمع جوه ودنى صوت أوامر
إلا أمر واحد
الله وأكبر
كان فى أدينا سلاح
ووياه حاملين سلاح
الله وأكبر
ولما مات فى قلبى حضنى
على أرض سيناالبطل
مات شهيد
سلمنى جواب
ورجعت شايله جوه جيبى
ولما قريته لقيته
كتبلى فيه
طالع بلا دنا وبختها
فيه عصابة بتتزرع فى أرضها
سرطان مخيف
ليه جذور بتاكل فى بعضها
مالوش دوا
يا تستأصله
يا تموت
فضلت أسرح
ويا فكرى وفى الجواب
العصابة
راكبه فوق قلوبنا وع الصدور
بانية بينها وبين الشعب سور
لو حد حاول يعدى
يا أما منهم
يا يتحرق جوه قطر ولا مسرح
فيه رواية تحكى تنوير العقول
ولا تغرق جوه بحر
لونه أحمر لونه أبيض
ولا حتى ف قلب شط جنب أرض
أو فى سجن عم عنتر
المشمر
واللى ماشى بأمر عبله
بدون أصول
هى دى أصل الحكاية
م البداية كان جواب
طالع بلا دنا وبختها
فى الدنيا عمرى ما شفت أختها
فى المرار والحظ اللى وجع قلبها
قول النصيب قول القدر
مش مهم أصله مين
بس أملنا فى الحرامية
الهربانيين
أشرف وطلعت وأسماعيل
يبنوا جييش
يحتل لندن
ونبقى دولة مستعمريين
يحتلوا مصر ويحرروها
وبدل الولد اللى مات شهيد
جوه سينا
يبقى ألأمل جوه
عصابة م الهربانيين
وهو ده حال بلادنا وبختها
يا حظها
***********
كتابات / حسن أرابيسك

طالع بلدنا وبختها 2


طالع بلدنا وبختها 2

طالع بلدنا وبختها واللى حصل لها
وأقول بلا خيبه
أقرا كلام الكبير وأفهم المعنى
تلاقى بين سطوره حاجات كتير
موزونه وليها معنى
أبو زيد الهلالى طلع كداب كبير
لا عمره ركب حصان
ولا مسك سيفه
ولاعمره ركب جناح
ولا بيك حا يطير
عمل ربان هايمان فى البحوربينا
ومشى تايه فى البحور
من مينا لمينا
أول ما مسك الدفه
مالت السفينه بينا
كان فيها خرم واحد أحنا سا دينه
خرم جنابها البعيد
وأسمع حكاوينا
أبو زيد خلف ولد
وقال دا خليفتى
وكل شىء فى البلد دى
أنا وأبنى بالفيفتى
أنا اللى حاكم البلد
وهو خليفتى
أنا أبو زيد الهلالى
فارس بنى خيبتها
يشهد على الوطن
أقتصاده وتعليمها
والفقر دا صنعه
أنتوا اللى صنعينها
العيش مخبوز بالعسل
واللعبه عرفينها
شويه رده على وشه
أنتوا اللى حرقينها
وكام شاب عاطل
مشكله أنتوا عاملينها
كام واحد غرق من قلة العوم
العيب عليه كان لازم يتعلمها
وفيه كام بلطجى لحفظ النظام والأمن
وكام حجر داير مغمس يزيح الغم
وشوية بدره شم على صاروخين بانجوا
وواحدة معرية وسطها والصدر مكشوف
دى مدرسه للحب بلا كسوف
أى وقت تلاقيها فى الخدمه يا أفندم
علشان اللى ما يعرفش يعرف و يتعلم
وسيما وسط البلد فيها كبارييه
تشوف فيها دينا سحبه معاها البيه
لما تهز وسطها هزه
تهز وسط البلد
بيره مع مزه
لما تشوف ظهرها
بطه مع وزه
ولما تشوف وشها
ما تقلش شكله لحد
كل الحاجات دى يا بلد
ومش عاجبكم أبو زيد
علشان سكوتكم عليا
أنتوا فى نظرى
شوية بهايم بترعى
فى قلب الغيط
علشان كده فى النهاية
كلامى وزنه ويبه
طالع بلدنا وبختها
وقول بلا خيبه
كتابات / حسن أرابيسك

الاثنين، ١٦ يونيو ٢٠٠٨

سلامتك يا نجم .............



رئيسنا المبارك
سلامة البهايم
سلامة حمارك
تاكل بطارخ
ناكل مرارك
تاكل مهما تشبع
الموت فى أنتظارك
تغير ف دمك
تركب كلاوى
حيبقى المقدر هو اللى باقى
وترجع عليك الكوى بنارك
يا مورث بلادنا
ودارنا هى دارك
همبك علينا
كلنا فى أنتظارك
طلع عنينا
ودادى حمارك
أقلق منامنا
واقفل ببانك
بالجامد علينا
من يوم ما أنت جيت
وجبت المهالك
لا مرة احنا نمنا
ولا مرة أشتهينا
مش عاجبك كلامى
طب أسأل مدامتك
من أمتى يا جهبز
قامت أيامتك
مسترجل علينا
تدلدل شفايفك
وفارد قلوعك
بظلمك لشعبك
المركب بتغرق
ماخلاص انتهينا
بكره تروح وتتقل قيمتك
وشعبك حا يلعن فى سيرة جنابك
ويشتم فى حكمك وحتى اللى جابك
وجوه المدافن حا يمشى اللى جنبك
وتسمع قواله ميت م اللى قبلك
يغور البخور من ريحة جنابك
مالك يا عقلى آيه اللى نابك
داير تخرف خسارة شبابك
سلام للبهايم سلام للى جابك
يهودى مأصل أشك ف جنابك
**************
قصيده لنجم النجوم

الجمعة، ١٣ يونيو ٢٠٠٨

حكايات حارتنا........


حكايات حارتنا........

كان فيه ف حارتنا برج عالى
فوق السطوح فيه عشه
فيها ديك شمورتى أبن اصول
رايح جاى يتمشى
بياكل الدره ويسيب الفول
وطايح فى فراخ العشه
نافش ريشه على خلق الله
وعمره ما خاف من الكشه
فى يوم واقف على السور
لمح فى الحارة فرخه
لما تشوفها تقول يا مرور
حوش الناس بقت خنقه
عروسه ملفوفه ف بنور
سبحان ربى مصورها
شعرها ليل ووشها نور
عينها ترمى تلقى قصور
ممدوده طالبه ف وصالها
لمحها الديك من فوق السور
غبى ما عرفش تمنها
نط من غير ما يدور
نزل فى الأرض مفشفش
كل جناح فيه مكسور
مات ونفسه فى جمالها
يا فاتنه أسألك الرحيل
قبل ماأرمى زليخه بعيالها
*************
كتابات / حسن عمران
الى أخوانى وأخواتى الأعزاء
توضيح
هذه القصيدة كتبت برمزين
الديك جمال مبارك والجميله هى مصر
والمقصود أنه عمره أنشاء الله
ما يطول حكم مصر
ستبقى مصر لنا عشقنا وأنشاء الله سيأتى لها رئيس
فارس يعوض الكثير لهذا الشعب
شكرا لكم حميعا وهذا للتوضيح
اخوكم فى الله

بحبك يا مصر 1


بحبك يا مصر
من آدان الفجر لما يشقشق
لحد العصر
وبحبك يا مصر من المغرب
لحد ما تطلع الشمس
بحبك يا مصر
وأحسبى معايا اليوم تلاقيه
حا يطلع كده يجى كام يوم
بحبك وأنتى فنجان مكسور
بحبك وأنتى طوبه فى سور
بحبك وأنتى منصوره
بحبك وانتى مكسوره
بحبك وأنتى مجرورة
بحبك وأنتى مرفوعه فوق رؤس الناس
بحبك لو كنتى حتى سم أتحطلى ف كاس
بحبك وأنتى زرع أخضر ف قلب الغيط
قمح دره فول مش مهم أنا طبيت
بحبك وأنتى صورة متشعلقه ع الحيط
بحبك يا مصر
وأنا شغال وأنا عاطل أو حتى موجود ف البيت
بحبك لما بتعملى شعرك ضفاير
بحبك وأنتى صبية تاخد عقول الضراير
بحبك وأنتى شايله زلعه وأنا ماسك بجلابيتك
بحبك يا أم الحضارة العظيمه
بحبك وانتى ريف ولا مدينه
حبك أنزرعت جذوره فى القلب
بحبك
وباكره ولاد الكلب
------------------
كتابات / حسن عمران
خلص الكلام وحان وقت العمل

الثلاثاء، ٢٧ مايو ٢٠٠٨

بحبك يا مصر ...2


بحبك يا مصر ...2

بحبك يا مصر .....بحب أبتسامتك
وبدعى لربى يحفظلى سلامتك من كل العيون
ووجع الجفون ...ويحفظ رموشك من كل الشرور
بحبك يا مصر.......بحب ورودك
واعشق خدودك ..........واكره وعودك
وألحن بعودك .........موالى وغنايا
بحبك يا مصر ....
بحبك فى عصرى وصباحى ومساكى
عشه فى عزبه......... وبيت جوه قصر
بحب الزحام والناس والمكان ......وصوت الأذان
يخش الودان ..........أنادى عليكى
بحبك يا مصر
بحب الشوارع والليل و المصانع
والراجل اللى صانع ........جمالك يا مصر
بحب سلامك وتيجى فى منامى ........عروسه معجبانى
بحبك يا حرة وأكره سجونك
وكل اللى خانك
وحبك فى قلبى قاعد مش مفارق
بحبك وعمرى ما خفت الطوارىء
بحبك يا مصر ...
بحب صباحك........وبعشق غيطانك
وكل مزارع بيعزق فى أرضه ينبت فلاحك
وبعشق سموك .....
والشمس اللى راحت والشمس اللى جاية
تنور ظلامك .....وتحفظ مقامك فى وسط البصيره
بحبك حتى وأنتى...جواهر ولا فالصوا
بحبك مهما كنتى
أرض وحصيرة
بحبك يا مصر ...والله دا انتى عندى
الدر والياقوت
بحبك م النهارده
ليوم القيامه
وحبك يا مصر فى قلبى علامه
بحبك يا مصر
وف حبك باموت
بحبك يا مصر
---------------
كتابات / حسن عمران

الأحد، ٢٥ مايو ٢٠٠٨

أنا لا أكذب ........


أنا لا أكذب ........

لما التاريخ أنكتب لأآكى

موجوده

فى أول صفحه كتب يتشرف

بالجوده

قال النهارده يا خلق أمكم

موجوده

دى هبا أصل الناس والكرم

والجوده

سجل أصل الحضارة هرم وآثار

ممدوده

ونيل بيجرى بأمر رب الخلق

والجوده

وناس طيبين شجعان ايديهم بالعون

ممدوده

يدور بينا زمان الكتب حضارات

مكتوبه

من عصر مينا وأحمس وتوت وملوكها

معدوده

ونشوف صور فرسان زمان بالنصر

موعوده

أيبك وبيبرس وصلاح وعلى والزعيم فى

وجوده

وتدور الرحاية للنهارده وقبل كده بسنين

ممدوده

كل ما أسأل سكنها غراب البين والناس نايمين

بنفوذه

دبل خدودها الوردى وضاعت البسمه

بوجوده

خط حيطانها سلاسل والناس مساجين

بوعوده

وينادى منادى للسامعيين يا بشر ملايين

ممدوده

آييه اللى باقى يا بلد تبكوا عليه أيام

سوده

وتدور الطاحونه تدوربينا دور

والى يطلق كلابه علينا دور

تنهش شباب البلد ومين عليه الدور

خلاص فقدنا الأمل يطلع علينا نور

وفى ظلام الليل يبان لنا نور
جدعان من أصلنا ماسكه مشاعل نور

طالعه تشق الليل وتخلى بكرة نور

أنده ونادى يا منادى وسمع جميع الخلق

بلدنا حضارة وتاريخ ما يضيعش فيها حق

مهما على نمرود حيلاقى فى بلدنا خلق

ونعيد كمان م البداية

لما التاريخ أنكتب لأآكى

موجوده

فى أول صفحه كتب يتشرف

بالجوده قال من النهارده يا خلق أمكم

موجوده هى أصل الناس والكرم

والجوده

-------------------

كتابات / حسن عمران

الأربعاء، ٧ مايو ٢٠٠٨

البكاشيين .......




البكاشيين
دول حكايتهم حكاية
شوية تلاقيهم يسار
وشوية تلاقيهم يمين
كل يوم يحكوا كلام
فى كلام

ويشمموك ويسجدوك
ويشربوك
وسكى وحشيش ويبرشموك
علشان يبيعولك كلام
وانت نايم فى التمام

البكاشين بيبيعوا كل حاجه
حتى الوطن
ما هو ده طبعهم
لما شافوا شعبهم م الطيبين
فى فكرهم
دول رعاع
ويطلعولك البتاع
وينزلولك البتاع
ويأكلولك البتاع
ويشربوك م البتاع
ويقولوك دا البتاع
اضحك عليهم بكلمتين
دول بيصدقوا أى حاجه
ما دام يدوب مش محصليين
كام رغيف
من غير غموس
طب آيه حا يحصل لو
أديت لكم للعيش غموس
تملوا بطونكم تشبعوا
وترجعوا تتكلموا ع البكاشيين
خليكوا كده جوه فى مكانكم
مأنفديين
وصدقوا أى حاجه يقولها ليكوا البكاشين
لما يطلعوا كل حاجه فى السليم
هما الحكومه وأنت الناس الطيبين
شوف كبيرهم لما وقف ع المصطبه
ومعاه شويه نصابين
فى عرف الوطن فنانيين
دول أصل الكدب كله
وهما أصل الكدابين
باعوا الوطن بالرخيص
ولبسوا توب أبن الخسيس
وأنضموا دوغرى للبكاشيين

البكاشيين صرفوا علاوه
علشان يا شعب
يسجدوك
ويدو أوك طعم الحلاوة
وبعد يوم
غلوا عليك كل حاجه
مين اللى قالك
تصدق أى حاجه م البكاشيين
ما دمت نايم
يا أبن والدى
وبيحكمك
شلة غجر م البكاشيين
ليهم كبير
بيعبدوه
ويمجدوه
ويقولوا إن ده هو
أمام البكاشيين
طب نعمل آييه
يا شعب طيب
تاكل حرنكش
وتلبس مزركش
وتعمل حرفرش
وتقوم تكسر
فى البكاشيين
يا أما كده
يا تموت بحسرة
على اللى ظلم
وقال رعاع
وأنتوا أصل
الطيبيين
فوق يا مصرى
فوق بقى
***********
كتابات / حسن أرابيسك


الأربعاء، ٩ أبريل ٢٠٠٨

فى يوم ميلادك اللى جاى.....



فى يوم ميلادك الجاى
وفى ساعة تمام
بدون كلام
شعب مصر طالع
يترحم عليك
ويودعك
مهما ترشق
الشارع أسود
أو تورث
حكم مصر
اللى عمرك
ما كنت تملك فيه
غير مضجعك
كل مصر طالعه
تودعك
من غير أسف
أو ندم
حا نودعك
فى الذكريات
نتذكرك بالأنجازات
لما عريت الهدوم
وغرقتنا فى بحر الهموم
وخليت ابنى عاطل
وقلبت كل الحق باطل
ووضعت مصر
جوه بحر م الديون
وهى شابه
عجزت
وما بقتش
تقدر يا حاج منجز
تعرف تعوم
أنجازاتك
أزمه جوه أزمه
زى جزمه
مفتقه من كل ناحية
فى يوم مطر
تتبل رجلك
وأنت مش حاسس
بالخطر
أنجازاتك
شاى وسكر
ولحمه وحطب
ورغيف برده
كله حصى
وكل يوم
تكذب علينا
العيش وصل
الجيش وصل
هو جيشنا
ساب الحدود
لليهود
ولا حا نحرس
الحدود
بشوال بصل
أنجازاتك
تعليم خلاص
خده الوبا
ومدرسين
مش لاقيين
حتى اللضا
وفصل فيه
قد عيدك
عيال متكدسه
شوف بقى
أنجازاتك
دكتور طبيب
بيداوى المرض
وهو أصلا
محتاج طبيب
وعايز دوا
أنجازاتك
فى الزراعة
أرض بور
جوه الكفور
والغيطان
متحصرة
على قمحها
وقطنها
أيام زمان
لما شافت
فلاحنا يعزق
ويعرق
وآخر المتمه
ينام جعان
أنجازاتك
فى المصانع
مكن قديم
وعامل بيصنع
ويصب عرقه
وحتى رشفه
من ميه رايقه
تروى عطشه
مش لاقيها
انجازاتك
فى كل شارع
طفل مرمى
جنب حيطه
ع الرصيف
فى يوم شتا
أو فى الخريف
ما تحسبوش
ما تعدهوش
من البشر
أو م الدواب
أنجازاتك
خمرة وحشيش
وواد مبرشم
وشم كله
على الرصيف
ولحمنا
من أنجازاتك
أتباع رخيص
أنجازاتك
فقر أزلى
وبنت بايرة
من غير عريس
وشاب ضايع
قبل التخرج
عايز يهاجر
أو ينتحر
من برج عالى
أو ع الرصيف
علشان سيادتك
تتطفى شمعك
يوم ميلادك
وتكون عريس
يا أنجازاتك
يوم ميلادك
لما ترحل
تكون يا عنتر
أحلى ذكري
سبتهالنا
من أنجازاتك
لما مصر
فى مايو تخرج
يوم ميلادك
تودعك
بدون أسف
أو ندم
على أنجازاتك
يومها نترحم
على اللى قبلك
من عهد مينا
لحد النهارده
نقرا فاتحه
وكام دعاء
الله يرحمه
يومها بس
أطلع أنا
و أمى مصر
نودعك
---------------
كتابات / أرابيسك

__________________

لقد وهبنى الله القلم وأنا وهبته لنصرة المظلوم لوجه الله
لآسكات الظالم وأظهارالحق وضحرالباطل

الأحد، ٦ أبريل ٢٠٠٨

كرهناك .............


كرهناك

كرهناك
يا عميل موسى موساد
وأبن الشافاك
يا أبن النازى والمحتل
كرهناك
لو راجل تقدر يوم
تطل م الشباك
حتلاقى مليون رصاصة
من بره بتستناك
كرهناك
وبعتنا رسالة
ورا رسالة
رايحين الآخرة معاك
مليانه دعوات
يتامى
وقفالك على باب القبر هناك
كرهناك
مهما تطلق عساكرك فى الميدان
بدون لجام
مهما تعتقلنا فى نعتقل
برده حافضل
أنا والملايين
خطوة خطوة وراك
ولما ترحل
يالله أهو راح هناك
مش حا نتذكرك
ولا الناس حا ترحمك
أهه راح
مع الظالمين هناك
كرهناك
هى دى سيرتك
كرهناك
الرسالة وصلت
كرهناك
----------------
كتابات / حسن أرابيسك

الاثنين، ٣١ مارس ٢٠٠٨

عطشان يا وطن حرية


عطشان يا وطن حرية
زى عصفور الكنارى
لما يغرد ع الشجر
بصوت مسموع
على الينبوع
مش زى أنا
عصفور سحلوه
مجروح
وضعوه جوه قفص
كسروا ضلوعه
م الجوع
حكم عليه الظالم بالموت
لآجل ما حدش يسمعه
ويسمع تغريده
عن الوطن والحرية

مشاق يا وطن مشتاق
حرية
زى طفل مشتاق لآمه
مش زى طفل محروم مفطوم
غصب عنه
بدل ما حد يهشكه
بيحرموه من ثدى أمه وحلمته
ويقذموه جوه مهده
قبل ما يشوف دنيته

ولهان يا وطن حرية
زى عاشق مشتاق مليان أشواق
لغرام زمان وموهجته
مش زى أتنين حبيبين
فى لحظة فراق
على المحطه تودعه
بدموع وأهات
حا يغيب هناك
ومين يا رب يرجعه

علشان كده يا وطن
شكوتى م العطش
من كتر النواح والصوت
ريقى نشف
من كتر ما ناديت ياللى فوق
عطشان أمل
عطشان شوق
عطشان حرية
مهما تشد سجنك
حيفضل الوطن عندى
ومش عندك
أنا أبن الوطن
وأنت أبن
الخيانة
حاتفضل أنت سجانى
وحا أفضل أنا الحرية
-----------------------
كتابات / حسن عمران

السبت، ٢٩ مارس ٢٠٠٨

يا ريت ترجعى يا مصر


يا ريت ترجعى يا مصر
طفلة
تشوفنى تجرى
ترتمى فى حضنى
أحن عليها
وأغنيلها أغنية فرح
لآجل أزرع البسمه
على وشوش ناس
طول عمر حلمها
آلم
-----------
خواطر .........عمران

يا سلام يا نيل
ياما شفت على ضفتك
ناس عشاق
وناس تشتاق
وناس تشكى همومها
وناس تحلم بيومها
وناس تنزل لموتها
وانت يا نيل
تنساب
تسقى وتروى
وناس بميتك
تغسل همومها
-------------
خواطر ...............عمران

حبيبى اللى بحبه وعينيى عليه راحت
أبيض زى الحليب
من كتر حمار خدوده السمنه عليه ساحت
عاشق يا ناس للمحاشى
نفسى عليه راحت
لما عمل تخسيس وزنته
طلع 100 لحم و 100 شحم
وخمسين منه راحت
عينى عليكى بارده
--------------------
خواطر ............عمران

خفيف الروح
ف يوم ميل عليا ميل
قلبى راح مرفرف
متقلش سبق خيل
تعبت وأنا أجرى
وهد فيا الحيل
فى يوم غسل وشه
طلع البعيد بالليل
رجلى قالت يا فكيك
م الخوف
جريت ميت ميل
--------------
خواطر ..............عمران


فى باريس تشوف العجب
وتشوف صيام رجب
أرض مكنوسه ومرشوشه
قول ممسوحه بصابون
لا شايف بصق ولا لصق
ولا ناس واقفه جنب الحيط
وناس تحتج وناس تتظاهر
والمعاملة رغم السب
أنسانية كمان
فى باريس تشوف أسلام
من غير مسلمين
أحترام أدب ونظام
ولما تنصاب فى حادث
تلاقى مليون واحد
مسعف
يساعدوك ويحيوك
بالسلام
----------------
خواطر .......... عمران

الثلاثاء، ٢٥ مارس ٢٠٠٨

رهينة المحبسين ...........




  • رهينة المحبسين
    هذا هو حال مصر وقدرها وشعبها والقدر وأمر الله نافذ ولكن لن يغير الله بقوم حتى يغيروا ما بأنفسهم معنى ذلك أننا لا زال عندنا أختيار ولن تبقى مصر أمنا رهينة محبسين مبارك وأبنه لو فلح الأب لفلح الولد ولكن مصر ستخرج من نقرة مبارك تقع فى دحدورة جمال علشان كده ومن غبر كلام سته أبريل يوم للتغيير غير يا مصرى غير الأمل فى الله كبير وكل ظالم وله نهاية يا ابناء الوطن مصر تناديكم فى يوم سته أبريل يوم الوطن يوم العصيان الكبير يوم أرسال رساله لمبارك هذا شعورنا فليحيا الوطن جوه فى قلوبنا مطالبنا مش بس أكل مطالبنا التغيير 1- أنتخاب رئيس من وسط عشرة 2- تحديد مدة الرئاسة بمدتين 3- عدم ترشيح أى من أقارب الدرجة الأولى قبل أنقضاء مدة قانونية 4- أستقالة مبارك 5- تعيين حكومة مؤقته أيها الشعب الأعتصام واجب لمصلحتك ومصلحة مصر ولمصلحة بكره لنا الله ولمصر النصر ----------------------كتابات / حسن عمران

الثلاثاء، ١٨ مارس ٢٠٠٨

دعاء شعب مصر على الحكومة


الدعاء على اللى غلوا البنزين ورخصوا الحريم وخلونا محتاجين وخربوا التعليم والصحة والصناعة والتجارة وخلوا بلادنا ملاهى ودعارة وهدموا الدين وأحنا محرابه وضيعوا الكرامه ورخصونا ولما نقول الحق يسجنونا الله أما تقبل دعاءنا دعاء المظلوميناللهم اكسر ارجل كراسيهم/واقلبهم على جنبيهم/ويقعوا واحنا نشيل فيهم/ ويسييبوا مناصبهم/ وكل الامراض تصيبهم/ ويناموا فى مستشفى ويا كبيرهم/ يا امبابه يا الدمرداش يا باب الشعرية/ ويدوهم دوا فاسد زى لبن الاطفال/ ياخدوه يجيلهم اسهال/ ويروحوا للبتاع يلقوه مقفول/ ولما يفتحوه ما يلقوش فيه ميه/ ولا يطهروش ويطلعوا بره/الهم اجعلهم يزروتوا الممشى/ وكل الدكاترة والممرضات تقرف وتمشى/ ومحدش يخدمهم ويناموا بريحيتهم/ ويتعروا بالليل والبرد يزكمهم/ اللهم احرمهم من اللحمه /علشان يحسوا الفقر/ ولما ياكلوها يجلهم جنون البقر/ وميعرفوش السبت من التلات/ ويسخنوا وندخلهم الحميات/ اللهم احرمهم من لحم البط والنعام/واذا كلوه تجيلهم انفلوانزا الطيور/ ونعزلهم فى جبل الطور/اللهم اكسينا وعريهم/ وركبنا ومشيهم/ واشفينا وعييهم/ وعلينا ووطيهم/ اللهم ورينا يوم فيهم/ اللهم بطهم ووزهم ولا تنعم عليهم/ اللهم ما فرج عليهم الناس فرجة الحاوى/ولم عليهم الناس لمة الحرامى/ اللهم اوجد لأولادنا عمل واجعلهم عاطليين/ واوجد لنا سكن واجعلهم مشرديين/ اللهم ما امنع عنهم اللحم الضانى واطعمهم بصارة/ولحم الغزال واذقهم مرارة العدس/ وامنع عنهم البط والنعام واطعمهم فول ومش/واخلع عنهم الحرير والبسهم الكستور المدعم/واحرمهم من الشبح والبودرة والحوت وركبهم اتوبيس شبرا او ميكروباس الدويقه/ هذا دعاء شعب خير بلده نهبوه نواب القروض واصدقاء اليهود .............وابناء عبد المعبود
-------------
حسن عمران

الأحد، ١٦ مارس ٢٠٠٨

سلام يا صاحبى سلام



سلام يا صاحبى سلام
مليون سلام
سلام للطفولة
ومصر الجميلة
فى الزمن اللى كان
وروحه الجنينه
والمشى فى الشوارع
وحب المكان
وركوب العجل
ومرجيحة عم رشدى
وبتاع اللبن
وحى العباسية
والموسكى والغورية
والست أم هاشم
ومصر الأمل
ورحلات المدارس
وأجراس الكنائس
وأصوات الأذان
والصحبة والمكان
يا حلاوة زمان
وشكوكو بالأزايز
والبخت فى اللبان
وبنات الجيران
واللمه ع النواصى
والقهوة والكراسى
وبقاله الأتاسى
وأكلة الكوارع
واللعب فى الشوارع
وعصير الحليوه
والأيام الجميلة
وبابا والجريدة
ومجلة الكواكب
ومرور المواكب
وصباح المدارس
وتحية العلم
سلام يا صاحبى
سلام
على أيام زمان
ومصر الأمل
سلام للنهارده
ووداع للزمن
أتفرج ع الهجايص
والوسكى للعايز
والشم بالبرايز
وتعرى ف الشوارع
والسب فى الطريق
وموزه للى عايز
وكله فى الهجايص
أضرب الودع
سلام يا صاحبى
سلام
على مصر
بلاد زمان
و يرحم اللى كان
وبعوده يا أيام
سلام يا مصر سلام
..................
كتابات / حسن عمران
خلص الكلام وحان وقت العمل

الثلاثاء، ١١ مارس ٢٠٠٨

سلطانية مهلبية



سلطانية مهلبية
بابا قلى عد المية
عشرة عشرين
خمسين ستين
م الحرامية
بص بلادنا
بقى يحكمها
خلاص سلطان
ومعاه شلة
نوارية
فيها هباش
فيها نتاش
فيها بكاش
بيحسن صورة الحرامية
وفيها سلطان
من عصر زمان
هو سواق العربية
وفيها حديد
جامد وشديد
وكمان سلطان
أبن سلطان
الحرامية
ومفيش أخلاق
قلة أرزاق
من كتر الناس
الفقرية
والدنيا زحام
والناس طوابير
والزحمة كتير
واقفين طوابير
طوابير ع العيش
متقلش دا جيش
داخل معركه
حربية
البلد أتباعت
والأرض
أهى ضاعت
يا عم كلام
أكتبلى كلام
عن أصل وفصل
حكومة القصر
دى بلادنا خلاص
بيحكمها يا ناس
سلطان خرفان
من عهد زمان
المصرى يا هو
مطلعش لبوه
ما ييرضى بحكم
النوارية
أشهد يا زمان
أحكم يا مكان
لبواقى أنسان
حافى مرضان
بيحب الكورة
وعمال يتظاهر
رافع أعلام
وكأنه نافورة
نازلة فوران
بتحيى حكومة
الحرامية
ونرجع من تانى
نحط النونو
جوه الغربال
وندق الهون
ونهز الكون
فى سبوع الواد
والواد حايكون
فارس ميمون
ويحرر مصر
من السلطان
وحكومة بابا
الحرامية
----------
كتابات / حسن عمران
خلص الكلام وحان وقت العمل