يامصر حاسبي على أهلنا
ـــــــــــــــــــــــــــــــــــــــ
يا مصر حاسبي على أهلنا م الحرمان
واوعي قلبهم ف حضنك الغالي يوم يتهان
معقولة يمصر فيكي بيتسرق حلمهم
ومعدش لطفل بريء في الحضن بر أمان
...
يا مصر قومي بقا كفاية هدّنا نومك
قومي يمّه و ع الظلم طلّعي جنونك
مهوّه عمره العقل ميدوس كرامة بلد
ولا يرضى الدّيابة ،تنهش ليوم الدين في الولد
يمّة و اوعي تخلّي الظلم سايد طول الأمد
...
قومي يا أم النّاس و ضمّدي جرحهم
وطبطبي على عمر ضايع أحسن يتوئد حبّهم
ويا مصر اديهم من حضنك الغالي و لو عشّه
وخلّي العيال ،ترضع حنانك و تتعشى
وطبطبي على أم فيكي قضت عمرها يا أمي غلبانة
عيالها يا حجّه ف حضنها وف حضنك الغالي أمانة
ومش تقبلي للغاليين فيكي يمصر أي اهانة
...
يا مصر و ادعي الكريم بكرا يمصر تتصلّح
وتشرق عليكي يمصر شمس ف عدلها تتمرجح
ويّا العيال،ومش عارفة تلاعب مين فيهم
وطول الليل ،يفضل نجمها ساهر يداديهم
...
وهتوزعي عدلك على كل العيال يا مصر
لحتّى نقول العدل فيكي صبح ف يوم و ليله قصر
يا مصر يا شمس الأصيل،بكل عدل و حنان جودي
واخطفي قلوب الورد لحضنك،ولحضني بقا عودي
وردك الغالي يمصر بقا مشتاق يتزيّن
تعالي قوام و زيّني بقا ورودي
يا جنّه و جنينة يمصر،
يا أم ولاّده،
يا كلّ الحياة فيكي ،
يا جنّتي ،
يا ارضي و جدودي.
ـــــــــــــــــــ
بلدي مصر و بحبّها
تحياتى / معلم فحمه
