WorldTimeServer Clock

Cairo

الاثنين، ٦ أبريل ٢٠٠٩



فى يوم ميلادك الجاى
وفى ساعة تمام
بدون كلام
شعب مصر طالع
يترحم عليك
ويودعك
مهما ترشق
الشارع أسود
أو تورث
حكم مصر
اللى عمرك
ما تملكش فيه
غير مضجعك

كل مصر طالعه
تودعك
من غير أسف
أو ندم
حا نودعك
فى الذكريات
نتذكرك بالأنجازات
لما عريت الهدوم
وغرقتنا فى بحر الهموم
وخليت ابنى عاطل
وقلبت كل الحق باطل
ووضعت مصر
جوه بحر م الديون
وهى شابه
عجزت
وما بقتش
تقدر يا حاج منجز
تعرف تعوم

أنجازاتك
أزمه جوه أزمه
زى جزمه
مفتقه من كل ناحية
فى يوم مطر
تتبل رجلك
وأنت مش حاسس
بالخطر
أنجازاتك
شاى وسكر
ولحمه وحطب
ورغيف برده
كله حصى
وكل يوم
تكذب علينا
العيش وصل
الجيش وصل
هو جيشنا
ساب الحدود
لليهود
ولا حا نحرس
الحدود
بشوال بصل

أنجازاتك
تعليم خلاص
خده الوبا
ومدرسين
مش لاقيين
حتى اللضا
وفصل فيه
قد عيدك
عيال محطوطه فيه
شوف بقى

أنجازاتك
دكتور طبيب
بيداوى المرض
وهو أصلا
محتاج طبيب
وعايز دوا
أنجازاتك
فى الزراعة
أرض بور
جوه الكفور
والغيطان
متحصرة
على قمحها
وقطنها
أيام زمان
لما شافت
فلاحنا يعزق
ويعرق
وآخر المتمه
ينام جعان

أنجازاتك
فى المصانع
مكن قديم
وعامل بيصنع
ويصب عرقه
وحتى رشفه
من ميه رايقه
تروى عطشه
مش لاقيها
هو ده آخرة قدرنا
واللى فيها

انجازاتك
فى كل شارع
طفل مرمى
جنب حيطه
ع الرصيف
فى يوم شتا
أو فى الخريف
ما تحسبوش
ما تعدهوش
من البشر
أو م الدواب
مهما أخبط
على ألف باب
ولما يفتح
وأحط أمل
وأقول دا تاب
تقفله
وأبتدى من جديد
سكه عذاب

أنجازاتك
خمرة وحشيش
وواد مبرشم
وشم كله
على الرصيف
ولحمنا
من أنجازاتك
أتباع رخيص
للى يدفع
وبقينا فرجه
للى يسوى
واللى ما يسويش

أنجازاتك
فقر أزلى
وبنت بايرة
من غير عريس
وشاب ضايع
قبل التخرج
عايز يهاجر
أو ينتحر
من برج عالى
أو ع الرصيف
علشان سيادتك
تتطفى شمعك
يوم ميلادك
وتكون عريس
يا أنجازاتك

يوم ميلادك
لما ترحل
تكون يا عنتر
أحلى ذكري
سبتهالنا
من أنجازاتك
لما مصر
فى مايو تخرج
يوم ميلادك
تودعك
بدون أسف
أو ندم
على أنجازاتك
يومها نترحم
على اللى قبلك
من عهد مينا
لحد النهارده
نقرا فاتحه
وكام دعاء
يومها بس
أطلع أنا
و أمى مصر
نودعك
ونودعك جوه قبر
كله ضلمه
من أنجازاتك
---------------
حسن عمران