نقطة نظام

نقطة نظام

مليون سلام وتحية
لكل المحلاوية
ناس وعمال وفلاحين
أول وتانى وتالت
وعقبال حلوان
وكل أسكندرية
من هنا كانت البداية
يا صاحبى خليك معايا
مش عايزك يا صاحبى
تضامن وتقولى
بيان وكلام
أنا عايزك تكون جنبى
وتعمل أعتصام
أيوه عايز منك بس
نقطه نظام
نقطه واحده تلمنا
كلنا مع بعضنا
نغنى أغانى لأمنا
عن الثورة والأعتصام
علشان ما يضعش حقنا
ونعود تانى نقول كلام
من هنا
نقطة نظام
تعالوا بينا كلنا
نحط النقط فوق الحروف
المحلة من بين ألوف
المحلة هى البداية
تعالوا بينا كلنا
نطرد الحرامى من وسطنا
ونركب سفينة الأمل
بشراع جديد
مفرود
من أسوان لبورسعيد
أيدينا فى أيدين بعضنا
كلنا ناخد قرار
من غير فرار
نمسك معاول الأمل
نهدم جدار الزمن
ونبنى بلادنا لوحدنا
وبلاش نقول
نصيب أو قدر
يلا نحطم زنازين الخوف
ونكسر قيود الخطر
كل شىء أحنا بنصنعه
بأيدينا نغيره
نكسره نحطمه
وننتصر
مره واحده ننتصر
ونعود تانى لآحضان أمنا
حضن واحد يضمنا
كلنا
من غير فراق
وبلاش تقول القدر
وتعيش أسير
من يوم ميلادك يا مصرى
وأنت حر أصيل
عمرك ما كنت يوم
فى تاريخنا ذليل
وبلاش تقول دا القدر
---------------
خلص الكلام وحان وقت العمل
حسن عمران
Omran55.maktoobblog.com
Omran55.blogspot.com
badralnhar.maktoobblog.com
dastor76.blogspot.com